洛陽、華山、西安 (2004夏)
第四天 兵馬俑博物館
晌呢度影唔到咩相, 一來晌展館內影有難度, 二來請左個導遊. 有個人跟住, 影得冇咁 free.
因為秦始皇堎墓同兵馬俑有好多典故, 所以學人晌展館請返個導遊講解.
個導遊帶完我地遊一號坑 (最壯觀果個), 講解得好出力. 佢跟住帶左我地去另一個館, 話 "拜訪" 發現兵馬俑果個 "老先生", 仲話好難得遇到佢晌度, 講到我地真係三生有幸咁. 佢 "說" 我地用百幾元買返本 "獨家" 兵馬俑圖片冊, 請 "老先生" 簽返個大名.
我地當然唔會中招.
跟住佢帶我地去買和田玉. 我扮晒有心機咁聽 SALES 講解和田玉既特性, 學下點樣去分真假和田玉. 最後, 我叫個 SALES 羅隻最貴既和田玉手鐲出黎, 俾我地摸摸. 見識完聲稱值幾千銀既和田玉之後, 當然冇幫襯.
個導遊見我地搞搞震, 一滴油水都冇益佢, 就話二號坑及三號坑維修中, 冇開放. 我地都費事佢跟住, 於是俾廿蚊導遊費, 叫佢走.
原來兵馬俑當年唔係就咁埋晌泥度, 而係放晌地下室. 右面果 D 木柱樑就係模仿當年地下室既樣子.
據講, 項羽火燒咸陽城時, 將地下室燒毀. 地下室下陷, 壓到兵馬俑變成碎片.
宜家我地所見到既兵馬俑, 就係考古學家將碎片逐塊復原.
晌兵馬俑博物館附近, 有人賣呢隻餅. 用燒熱既黑色石卵煎成.
博物館附近有好多記念品賣. 其中以呢 D 陝西手工藝最有特色.
