大鼻舊舊 北海道‧京都夏季花間行

繼去年完成東京車展之旅後, 一路都只係流住口水, 睇住其他朋友去旅行, 真係只有恨既份。直至年頭某日, 收到一張結算表, 令我即刻感到人間重係有溫暖, 世界重係有希望。呢張係咩? 咪就係亞洲萬里通既月結表羅! 只因為經過幾年既努力, 我居然真係儲夠里數, 換到去日本既免費機票。呢的儲分換免費野, 我從來都未試過成功既, 無論係買音樂光碟, 咖啡店食物館, 甚至買報紙, 都係永遠過左期都儲唔夠, 真係激死人架! 但今次我居然換到, 重要係一張機票, 真係"生命滿希望, 前路由我創".

目的地其實都一早係意屬北海道, 但究竟經咩野路線去好呢? 係復活節前後左近, 我就一路留意住去日本既消息, 一聽到話特區護照同BNO都免簽證時, 已經預料到應該會有大量旅客, 所以立刻行動, 先上國泰網頁查核一下, 七月份既北海道直航機載客情況, 發覺有幾日都有客滿。由於女友既員工票係要讓路俾客人既, 所以為穩陣計, 都係取道大阪, 再轉乘內陸機上北海道。

經網頁訂妥香港至大阪既來回航班, 係我最喜愛既凌晨機七月七日出發, 七月二十日下午機回港。跟住就企劃行程, 由於之前已經遊過札幌, 小樽, 函館一帶既地方, 今次揀富良野薰衣草同埋道東一帶做主題。主題大致定好, 首先要解決交通, 由於大阪至北海道距離比較遠, 內陸機會係比較節省時間既方案, 順理成章都係選擇左內陸機, 係預訂內陸航班既其間, 遇上兩個小問題, 可以同大家分享番既。

本來一廂情願以為有國際航班既訂票既參考編號就可以, 但原來係要確認機票之後既機票號碼先可以, 於是先打電話俾萬里通既熱線, 請佢地幫我立即進行出票程序, 話就係立即, 其實都要幾個工作天, 呢個係第一樣要留意既。其次係內陸機既多程優惠票原來係有季節既, 日航係二零零四年就只係做到七月十五日, 暑假期間係會暫停既。如果唔係七月十五日前完成內陸航班, 價錢係接近兩倍, 呢樣就打亂我本來既行程, 因為本來預計可以係北海道逗留十日至七月十六日既, 依家只好將就一下, 係行程中提前離開。

由於對應道東既火車班次比較疏落, 計算埋時間既配合, 自己駕車係比較有彈性既選擇, 所以一早經HERTZ代訂豐田既車, 但其實後來發覺直接上豐田既網訂係比較相宜, 主要係可以訂到比較基本型號既車, 所以價錢可以便宜一點。攪妥交通之後, 就係住宿問題, 最先要預備既係富良野美瑛一帶既屋仔(Pension), 通常會係最早滿座。總共訂左三間, 一間富良野, 兩間係美瑛。其他就係東橫Inn, 但由於係京都頭幾日撞正祗園祭, 東橫Inn都滿晒, 要住京都New Miyako。

到最後, 就係去書店同上網搵下參考資料, 做下功課, 睇下車程, 景點編排, 搵食情報之類, 等旅途上可以順暢的。